Niðurgangur hjá hundum: hvað á að gera og hvenær þarf dýralækni?

Flestir hundaeigendur lenda í þessu fyrr eða síðar. Hundurinn fær niðurgang, oftast af því að hann át eitthvað sem hann átti ekki að éta, og í langflestum tilfellum lagast þetta af sjálfu sér á sólarhring eða tveimur ef meltingin fær smá hvíld og léttan mat. Það sem skiptir máli er að vita hvenær þú getur rólega sinnt þessu heima og hvenær þú átt að hringja í dýralækni.

Af hverju fær hundurinn niðurgang?

Langalgengasta ástæðan er einfaldlega eitthvað sem fór ofan í hundinn. Matarafgangar, rusl, feitur matur eða eitthvað sem hann fann úti á göngu. Næst á listanum eru of hröð fóðurskipti. Meltingarflóran þarf tíma til að venjast nýju fóðri og þess vegna er skipt yfir í nýja tegund smám saman á sjö til tíu dögum.

Streita getur líka sett meltinguna úr skorðum, til dæmis flutningar, pössun, nýtt dýr á heimilinu eða ferðalag. Sníkjudýr koma líka til greina, bæði ormar og einfrumungar á borð við giardia, sérstaklega hjá hvolpum og hundum sem hafa ekki verið ormahreinsaðir reglulega. Sýkingar af völdum baktería og veira eru alvarlegri, og parvóveira er lífshættuleg hvolpum sem eru ekki fullbólusettir.

Ef niðurgangurinn kemur aftur og aftur án augljósrar ástæðu er rétt að hafa fæðuóþol eða ofnæmi í huga. Að lokum geta sum lyf valdið niðurgangi, auk þess sem ýmislegt sem er skaðlaust fólki er eitrað fyrir hunda. Við höfum tekið það saman í greininni um hvað hundar mega ekki borða.

Hvað getur þú gert heima?

Ef hundurinn er fullorðinn, hress og niðurgangurinn vægur, þá er þetta það sem dýralæknar ráðleggja almennt.

Fyrst og fremst vatn. Hundurinn tapar miklum vökva þegar hann er með niðurgang, svo hafðu ferskt vatn alltaf aðgengilegt og fylgstu með því að hann drekki. Takmarkaðu aldrei aðgang að vatni.

Gefðu honum svo auðmeltan mat í litlum skömmtum. Soðinn kjúklingur án skinns, beina og krydds með soðnum hvítum hrísgrjónum er gamla góða ráðið, og sérhæft meltingarfóður frá dýralækni eða gæludýrabúð gerir sama gagn. Hjá okkur fæst til dæmis blautfóðrið Dolina Noteci Perfect Care Bati og Perfect Care fyrir þarma, og Oropharma Opti Digest frá Versele-Laga.

Litlir skammtar nokkrum sinnum á dag fara betur í magann en einn stór. Þegar hægðirnar eru orðnar eðlilegar aftur bætirðu venjulega fóðrinu smám saman við aftur á þremur til fimm dögum.

Meltingargerlar sem eru ætlaðir hundum geta hjálpað meltingarflórunni að jafna sig fyrr. Fylgstu svo með hægðunum, litnum, áferðinni og hvort blóð eða slím sést. Það er ekki vitlaust að taka mynd, því þá geturðu lýst þeim nákvæmlega fyrir dýralækni ef á þarf að halda.

Eitt sem þú átt ekki að gera er að gefa hundinum lyf sem eru ætluð fólki, til dæmis hægðastemmandi lyf eða verkjalyf, nema dýralæknir hafi beinlínis sagt þér það. Sum þeirra eru hættuleg hundum, og niðurgangur er stundum leið líkamans til að losa sig við eitthvað, og þá á ekki að stöðva hann með lyfjum.

Hvenær á að fara til dýralæknis?

Hringdu í dýralækni ef eitthvað af þessu á við:

• Niðurgangurinn hefur varað lengur en einn til tvo sólarhringa, eða kemur og fer vikum saman.
• Það er blóð í hægðunum, eða þær eru svartar og tjörukenndar, sem bendir til blæðingar ofar í meltingarveginum.
• Hundurinn kastar líka upp, er slappur, er með hita eða vill hvorki mat né vatn.
• Þú sérð merki um vökvaskort: þurrt tannhold, innfallin augu eða húð sem leggst ekki strax niður aftur þegar þú klípur varlega í hnakkann.
• Hundurinn er hvolpur, gamall eða með undirliggjandi sjúkdóm. Slíkir hundar þola vökvatap mun verr, og hjá hvolpum getur parvóveira legið að baki.
• Þig grunar að hann hafi étið eitthvað eitrað eða gleypt aðskotahlut.

Hvernig kemur þú í veg fyrir þetta?

Þar sem flest tilfelli má rekja til þess sem fer ofan í hundinn er forvörnin að mestu leyti á þínu valdi. Skiptu um fóður hægt, ekki gefa matarafganga af borðinu og gefðu nammi í hófi. Ormahreinsaðu reglulega samkvæmt ráðleggingum dýralæknis og haltu bólusetningum við. Ef hundurinn fær ítrekað niðurgang af sama fóðrinu er það vísbending um að rétt sé að prófa aðra tegund, og þá er oft gott að byrja á fóðri fyrir viðkvæma meltingu með einni próteintegund.

Algengar spurningar

Má ég láta hundinn fasta?

Hvolpar, smáhundar og gamlir hundar eiga ekki að fasta. Vatn á alltaf að vera aðgengilegt. Í dag ráðleggja margir dýralæknar litla skammta af auðmeltum mat strax frekar en langa föstu.

Hvað á ég að gefa hundi með niðurgang?

Soðinn, fitulítinn kjúkling án beina og krydds með hvítum hrísgrjónum, eða sérhæft meltingarfóður. Litla skammta, oft á dag, í tvo til þrjá daga.

Hvenær er þetta hættulegt?

Þegar blóð sést, hundurinn kastar líka upp eða er slappur, eða ef hann er hvolpur, gamall eða veikur fyrir. Þá hringirðu í dýralækni samdægurs.

Heimildir

VCA Animal Hospitals: Diarrhea in Dogs · PDSA: Diarrhoea in dogs · Merck Veterinary Manual · American Kennel Club: Dog Diarrhea

Þessi grein er almennur fróðleikur og kemur ekki í stað skoðunar dýralæknis.